Ezpelura elkartean biltzen diren emakumeek iazko ekitaldien balantze positiboa egin dute eta aurten ere, bertze horrenbertze antolatzeko asmoa azaldu dute.
Iazkoari dagokionez, martxoan Emakumearen Astearen barnean gorputz irudia eta elikadurari buruzko solasaldiak antolatu zituen. Apirilean, urpekaritzari buruzko erakusketa eta diapositiba emanaldia izan zen. Kantabriako Cavárcenora egindako bidaian 55 lagunek hartu zuten parte. Maiatzean ikastaroen txanda izan zen. Sendabelarrei buruzko ikastaroan hamar lagun izan ziren eta erizain batek eskainitako erlajazio ikastaroan hamabortz.
Uztailean Arcachonera txangoa antolatu zuten, bertako ur-parkea bisitatzeko eta 35 lagun joan ziren. Urrian, ikasturte honetako ikastaroei hasera eman zieten. Donamarian ematen den altzarien zaharberritze ikastaroan bederatzi lagun ari dira, Donamaria, Ituren, Legasa eta Doneztebekoak. 60 orduko ikastaroa izanen dute. Donezteben egiten ari den tapizeria ikastaroan 16 lagun ari dira eta hauek ere 60 orduko ikastaroa eginen dute. Ikasleak Doneztebe, Donamaria, Oronoz-Mugairi eta Etxalarkoak dira eta tartean gizaseme bat ere badago.
Donezteben burutzen ari den jostungintza ikastaroan, 24 eta 55 urte bitarteko 14 lagun ari dira, gehienak hasi berriak.
Abenduan, Eguberrietako sukaldaritza ikastaroa eman zuten, hiru egunez. Adin guzietako 27 lagun izan ziren, Burlatako Ostalaritza Eskolako irakasle batek emandako aholku eta errezetak jasotzen.
Gimnasia ikastaroan 24 pertsona ari dira, tartean gizaseme bat.
Erriberrira egindako txangoan, azkenik, 55 lagunek hartu zuten parte. Erriberriko gaztelua bisitatzeaz gain, Vidaurre pasta enpresan eta Cárricas bodegan izan ziren.