Nafarroako Gobernuko Presidentearen euskarazko liburuei buruzko adierazpenak irakasleen ahotan izan dira egunotan. Eta burura etorri zaigun lehendabiziko galdera hau izan da: zein ebaluaketaren ondorioz esaten da ez direla liburu onargarriak? Hezkuntza munduan, edozein aldaketa ezartzeko, ikerketak, sondeoak, frogatzeko epeak,... bete behar izaten dira. Zein izan da ikerketaren metodoa, laneko hipotesiak? Nola kontrastatu dira?
Aipaturiko nondik norakoak argitu beharko ziren denon lasaitasunerako. Ia jaio berria den hezkuntza erreforma honetan: Horrenbeste aldendu dira materialak kurrikulumetik epe motz honetan balizko ikerketa horretan nabarmentzeko?
Bestalde, legalki, irakasleak zein testu liburu erabili erabakitzen du. Bestelako materialak –entziklopedia, atlasa, mapak, beste liburuetako fotokopiak, irakurtzeko materialak, bideoak, kasetak– errebisatu behar al dituzte? Are gehiago, ikasleek institutoko irakasleak bidalita, aiton-amonei galderak eginez lortzen duten informazioa birpasatuko ote dute? Ikasleek obserbaketaren bidez lortzen duten informazioa ere kontrolatuko al da? Nafarroako Gobernuak duen konpetentzia erabil daitezkeen testu liburuak onartzea da. Espero dugu 2000. urtean irakasteko modua errespetatua izan dadin.