Analisiak hasi direnetik lehendabizikoa aste honetan tokatuko zait. Aste honetan eraman behar dute behi-zahar bat hiltzera. Guk Donostiara eramaten dugu eta beraiek egiten dituzte analisiak eta gainontzekoak. Hemen inguruan ez dut uste analisi gehiago egin direnik, hemen haragi behiekin gutxi ibiltzen baitira. Batzuk 4 edo 5 behi dituzte eta bakarren batek 10-15, eta gero esnetakoak 3 edo 4 abeltzain gaude.
Orain egiten hasi diren analisi hauetan bakarren bat positibo agertzea ez nintzateke batere harrituko. Neri ere igual-igual tokatzen ahal zait, hori loteria bat bezala da. Tokatuz gero ikuiluko behi guztiak kendu behar dira, nahiz eta indemnizazioa ematen omen duten. Dena den ez da %100a izanen, hori seguru. Astakeria iruditzen zait bat kutsatua egoteagatik denak kentzea. Izan ere, besteak kutsatzeko arriskurik ez dagoela esaten dute, eta egonen balitz ere hiltzeko garaian analisia egiten zaie denei, beraz, batek positiboa ematen badu baztertu eta punto.
Ederki nabaritzen da behi eroen kontua. Orain behi zaharrak prezio erdian daude, txekor txikiak 5-10.000 pezeta gutxiago balio dute. Etorkizunera begira nik uste dut buelta izanen duela honek, bolada txar bat besterik ez da.