Ituren, Zubieta eta Aurtizko joaldun eta mozorroek urteroko ohitura bete eta herriz herri eta auzoz auzo ibili ziren ilbeltzeko azken astelehen eta asteartean. Astelehenean, Zubietatik abiatu ziren joaldunak eta Aurtizkoekin gosaldu ondotik Iturenera jautsi ziren. Iturengo joaldunak Lasagako zubira atera ziren bertze taldeetako joaldunen bila. Ondotik, hiru taldeek elkarrekin ibilaldia egin zuten Iturenen. Gero, talde bakoitzeko kideek norbere txokoan bazkaldu zuten. Asteartean, bidea alderantziz egin zuten. Iturengo joaldunak herritik abiatu eta, Aurtizkoak bildu ondotik, Zubietara joan ziren, bertako joaldunekin elkartzeko.
Joaldunekin batera, mozorroak ere harat-honatean ibili ziren, hautsa, iratzea, gorotza eta kolperen bat edo bertze banatuz. Hartzak ere bere lana bete zuen eta, katearekin lotua egon arren, emakumeak –batez ere kanpotik etorritakoak– izitzen aritu zen.
Urtero bezala, hainbat eta hainbat izan ziren bi egun horietan Ituren eta Zubieta bisitatu zutenak.