Hiru egunetan euria egin bazuen ere, giro ederrean pasatu dira iñauteriak. Ortziral goizetik hasi eta igande arratserarte ederki pasatzeko ekitaldiak gozatu ahal izan zituzten sunbildarrek.
Ortziral goizean gazteak eskean hasi ziren baserrietan barna. Atsaldean, haurren txokolatada eta dantzaldia zubi berrian egin zen, Udaletxeko arkupeak obretan daude eta. Emakume afarian inoiz baino jende gehiago izan zen, ehun pertsona pasatxo bildu baitziren. Urtero bezala, afalondoan sorpresa izan zuten eta aurten akordiolari talde bat izan zen, herriko emakumeen afaria animatzen. Ondotik, urtero bezala, dantzaldia egin zen elkartean.
Larunbatean, gazteak puxkak biltzen aritu ziren herrian barna. gauean, kristoren martxa izan zen herriko ostatuetan.
Igandean, goiz-goizean hasi zen mugimendua herrian. 11,30ak aldera atera ziren karrozak Leku-Eder karrikatik. Urtero ardoa, salda, gaztainak, tortilla eta opila banatzen duten karrozez gain, bertze hamalau atera ziren: Miss Sunbilla, Gran Hermano, 50x15, Copa Davis, Aquarium, Harriketariak, Zirkoa, Autoeskola, Tamara, Zerua eta Infernua, Lehengo ikazkinak, Erromatarrak, Hamalau atso tronpeta jotzen zazpi astoren gainean eta Behi Eroak.
Argi dago urtetik urtera gauza berriak egiten ahal direla aspaldiko kontuekin edo urtean pasatutakoekin.
Igande atsaldean, ihauteriak akitzeko herri bazkaria egin zen Ulibeltzak elkartean eta gero, Jalisko Band-ekin dantzaldia izan zen.