Otsailaren 10ean jokatu ziren Iruñeko Labrit pilotalekuan Neguko Cajanavarra pilota txapelketako finalak. Bertan, Txarutako pilotariak izan ziren protagonista: Bortz finaletatik lautan bazen Baztan-Malerrekako bikoteren bat eta horietatik hiru irabazi egin zituzten.
Ttikienetatik hasita, Txarutako Arretxea eta Madariagak 18 eta 16 irabazi zieten Altsasuko Zabaleta eta Galartzari. Hurrengo partidan, Txarutako Goñi eta Arregik 18 eta 12 irabazi zieten Huarteko Irurita eta Yoldiri. Iruñeko Etxeberria eta Urdanizek 18 eta 15 irabazi zieten Txarutako Urtasun eta Ibarrari. Gazte mailakoa izan zen baztandarrik gabeko final bakarra. Dena den, Lekunberrirekin ari den Oinatz Bengoetxea leitzarrak erakustaldi bikaina eskaini zuen Astizekin batera eta 18-4 irabazi zieten Altsasuko Urrestarazu eta Lagos-eri. Bengoetxeak 16 urte bertzerik ez ditu, baina dagoeneko Asegarcerekin entrenatzen ari da, Salvador Bergararen agindupean. Adituen ustez, etorkizun ederreko pilotaria da. Zartakoe indartsuak eta intentzio handikoak ematen ditu.
Handien kategorian, azkenik, Txarutako Jaurena eta Huartek 22 eta 11 irabazi zieten Uharte Arakileko Errea eta Beregañari. Nahiko aisa gailendu ziren baztandarrak. Gibelean sendo aritu zen Huarte eta aitzinean Jaurenak ederki lagundu zuen eta ongi akitu zituen tantuak.