Otsailaren 10ean hasi zen Leioan (Bizkaia) Euskal Herriko goma gaineko sokatira txapelketa. 560 kiloko lehen saioan, gizonezkoetan, Areso izan zen onena, tiraldi guziak irabaziz. Nafarroako txapelketan Beti Gazteren menpe egon ziren, baina Euskal Herrikoa lortzen ahal dutela erakutsi zuten. Bigarren Beti Gazte izan zen. Lesaka-rrek Aresorekin galdu zuten, baina gainerako tiraldiak irabazi egin zituzten, nahiz eta Leioako Euskal Kirol Zaleakekin lan dexente egin behar izan zuten. Hirugarren Abadiño izan zen, laugarrena Euskal Kirol Zaleak eta bosgarren Altamira-Gazteak. Azken postuan berdinduak gelditu ziren Torrekolanda eta Auzolan-Igeldo, bertze tiraldi guziak galdu ondotik, euren artekoan berdindu egin baitzuten.
Hemendik aitzinera, apirilaren 8a arte, asteburuero izanen da Euskal Herriko txapelketako saiorik. Joan den asteburuan 600 kiloko lehen tiraldiak egin dira. Otsailaren 24an, 560 kiloko bigarren saioa eginen da Arrigorriagan (Bizkaia) eta otsailaren 25ean 640ko lehendabizikoa Arronizen (Nafarroa). Martxoaren lehen asteburuan 600 kiloko bigarren saioak eginen dira Orozkon (Bizkaia) eta Betelun.