Ortzegun honetan, otsailak 22, goizeko bedetziak aldera haur andana ibiliko da herrian barna, etxez etxe eskean. Eskolako haurrek baserritar jantziak paratuko dituzte, saskia eskutan, «urtzaingizen, urtzaingizen, zingar arraultze, bat ez bada bertze: biek hobe!» kantatuz ibiltzeko. Eguerdi partean akabila emanen diote eskeari eta arratsaldeko prestatuko dira. Izan ere, arratsaldean, hiruak aldera, plazan bilduko dira denak, bakoitza bere mozorroarekin. Eskolan prestaturiko bertsoak kantatuz emango diote hasiera herriko bueltari. Lehenik eta behin, Jauregieta auzoan haur hezkuntzakoek «Urrestillako bortz kantariak» antzestuko dute. Iñarretan Lehen Ziklokoek «Txorimaloa» eskainiko dute. Bigarren Ziklokoek «Diruak sendatuko du» eginen dute Andutzetan. Ondotik, denak elkartuko dira «Sutan dator dragoia» kantatzeko, eta azkenik plazan, Hirugarren Ziklokoek «Enperadorearen jantzi berria» antzestuko dute. Egun berexi honi bukaera emateko berendua eta dantza izanen da herriko trikitilariekin.
Haundien Iñauteak
Astelehenean berriz, herriko gaztiak Haritzpen bilduko dira gosaldu ondotik, trikitilarien laguntzaz baserriz baserri ibiltzeko. Bi taldetan banatuko dira, goiko eta beheko auzoetara joateko. Bazkaltzeko tenorea ailegatzerakoan, Anttonion bazkalduko dute beheko auzotakoek eta Usazaleen txabolan goiko auzokoek. Ondotik, baserriz baserri segituko dute denek iluntzerarte. Afariak bi taldeak elkartuko ditu Haritzpen. Asteartean, karrozen desfilea izanen da eguerdi aldera, gosariaren ondotik. Herriari buelta eman eta gero, bazkaria izanen da Anttonion eta Herriko Ostatuan eginen den afariarekin emanen zaie bukaera aurtengo iñautiei. Dudarik gabe, data seinalatuak herritar guzientzat.