Igande honetan, martxoak 11, arratsaldeko 4,30etan Elizondoko Antxitonea trinketean eginen den saioak hasiera emanen dio aurtengo Nafarroako Bertsolari txapelketari. Mikel Altzuart, Ekhine Etxepeteleku, Iñigo Ibarra, Jean Louis Harinordoki «Laka», Fermin Mihura eta Julen Zelaieta ariko dira saio horretan. Hurrengo larunbatean, martxoaren 17an, Lodosako Kultur Etxean eginen da bigarren saioa, Nerea Bruño, Oskar Estanga, Ekintza Landa, Joxema Leitza, Joxe Juan Zubieta «Etxabe» eta Aritz Saraguetarekin.
Txapelketa, berez, martxoaren 2an hastekoa zen Lodosan, baina prentsaurrekoa emateko zegoela ikusirik eta propaganda aldetik hutsune handi xamarrak zeudela oharturik, Nafarroako Bertsozale Elkarteko Zuzendaritza Batzordeak txapelketaren hasiera atzeratzea erabaki zuen.
Bertze hamar bertsolari zuzenean finalerdietan hasiko dira
Bi kanporaketa hauetatik zazpi bertsolari pasatu dira finalerdietara, saio bakoitzeko bi onenak eta puntuaziorik altuena lortu duten hurrengo hiruak. Joan den urteko sailkapena kontuan hartuz bertze hamar bertsolari zuzenean ariko dira finalerdi horietan. Martxoaren 18an, arratsaldeko 5etan Leitzako zineman Xabier Legarreta, Xabier Silveira, Manolo Arozena eta Xabier Terreros ariko dira, kanporaketa gainditu duten bertze bi bertsolarirekin batera.
Hurrengo finalerdia martxoaren 23an eginen da, arratsaldeko 6etatik aitzinera Iruñeko Iruñezar Euskaltegian. Amets Arzallus, Bittor Elizagoien eta Iñigo Olaetxea, bertze bi lagunekin ariko dira.
Hirugarren finalerdi bat ere izanen da, martxoaren 25ean, arratsaldeko 4etatik aitzin Izpuran. Estitxu Arozena, Sustrai Kolina eta Juan Mari Lopez dira zuzenean ariko diren bertsolariak, kanporaketako bertze hirurekin.
Finalerdiko saio hauetan honako lana egin beharko dute bertsolariek: Zortziko handian hiruna bertso ofizioka, zortziko ttikian hiruna bertso ofizioka, bi puntturi erantzuna eman, hamarreko ttikian hiruna bertso ofizioka eta kartzelan, hamarreko handian azkenaurreko puntua emanda eta gai bati hiru bertso kantatu beharko dituzte.
Final nagusia apirilaren 1ean Berako Eztegara pilotalekuan
Finalerdietatik zortzi bertsolari pasatuko dira, apirilaren 1ean, arratsaldeko 4,30etan Berako Eztegara pilotalekuan eginen den final handira. Finealean honako lan hau egin beharko dute: Zortziko handian hiruna bertso ofizioka, hamarreko ttikian hiruna bertso ofizioka, hiru puntturi erantzuna eman, Mainontzin hiruna bertso ofizioka eta kartzelan, gai bati hiru bertso.