Iruritako Andres Elizaintzin eta Igor eta Oskar Urrutia anaiak suertatu dira txapeldun Laxoa Elkarteak bigarren aldiz antolatutako paxaka txapelketan. Iruritako Aranabia pilotalekuan martxoaren 3an jokatutako final borrokatuan 9 eta 7 irabazi zieten iazko txapeldunei, Doneztebeko Arraztoa, Artazkoz eta Etxeberriari.
Igor Urrutia, ongi sakatzeaz gain, bikain aritu zen gibeletik. Oskar anaiak ederki lagundu zion eta min gehien egiten duten lekura botatzen zituen pilotak. Andres Elizaintzin fin aritu zen sare inguruan eta tantu aunitz ongi akautu zituen. Doneztebarren artean Patxi Etxeberria nabarmendu zen. Sakatzeaz gain, pilota gehienak eskatu eta ongi eman zituen, baina azken aldera nekea somatu zuen. Artazkoz ere ongi ibili zen sare ondoan eta tantu ikusgarriren bat lortu zuen. Arraztoa ere saiatu zen eta zabalean pilota gaixto batzuk altxatu zituen.
Lehen jokua baztandarrek egin zuten, baina hurrengo biak doneztebarrek egin zituzten. Bina berdindu ondotik, berriz ere bi joku segidan egin zituen Doneztebeko hirukoteak. Iruritakoak 3-4 hurbildu ziren, baina bosgarren jokua egin zuten Etxeberria-Artazkoz eta Arraztoak. Hor etorri zen Urrutia anaien eta Elizaintzinen susperraldia, bortz joku segidan egin baitzituzten eta 8 eta 5 irabazten jarri. Bazirudien txapela segurtatua zutela, baina doneztebarrek azken eginahala egin zuten. Bi joku egin zituzten eta markagailua arras estutu zuten, 8 eta 7koarekin. Baina Iruritakoak ez ziren kikildu eta azken jokuarekin, txapela ere irabazi zuten.
Hirugarren postua elizondarrentzat
Aitzinetik hirugarren posturako lehia jokatu zen. Iruritako Josu Prim, Iñaki Etxandi eta Jexux Garate, Elizondoko Jon Franzesena, Iñigo Unanua eta Joseba Urtasunen kontra aritu ziren. Finalean bezalaxe, Alberto San Migelek bete zuen epaile nagusiaren lana. Partida orekatua joan zen, berdinketa aunitzekin, baina azkenean Elizondokoak nagusitu ziren, 9-7.
Partida hori galdu arren, txapelketak emandakoarekin aski gustora ageri zen Josu Prim, antolaketa lanean ere aritu baita. «Gan den urtean zortzi hirukote ginen, aurten hamabortz eta jokua ere ikusgarriagoa izan da. Bortzirietan ere hasiak gara paxaka eta laxoa zer den erakusten eta gustora ikusiko genukeen hango talderen bat txapelketan».