Ez da normala eguraldi hau, ezta ona ere. Neguan neguko eguraldia egin behar du, gainerakoan kanpoa neguan aurreratzen da eta primadera txarra heldu baldin bada, akabo!
Aurten ez dakit beranduko izotzik eginen ote duen, bainan haizearen aldaketa batekin ez da harritzekoa izaten bi edo hiru izotz egitea, hemen Leitza alde honetan ez behinipin. Bera aldean eta beharbada ez horrenbeste, baina Leitzalde hau leku hotza da.
Oso tenperatura altuak izan dira negu honetan, nik ez dut klase honetakorik ezagutu. Orain dela 40 urte baino gehiago ilbeltza izandu zen ikaragarri ona bainan otsaila oso txarra egin zuen eta pinuak eta dena ihartu zituen.
Joan den martxoaren 7an, 9an eta 10ean izandu ziren tenporak, eta nahasi xamarrak gelditu dira. Izandu dira haize aldaketak, mendebaldekoa, hegomendebaldekoa, haizegoa… denetarik. Tenporek denboraldiko hiru hilabeteetan zer eginen duen iragartzen dute eta seguraski horrela izanen dugu eguraldia, nahasi xamarra.