Bertze bi garaipenak 1999an eta 2001ean eskuratu zituen
Baztan-Errekako Laxoa Txapelketaren 30 urteko historian, hiru aldiz eskuratu du Arraiozek txapela, eta azkena, abuztuaren 2an jantzi zuen herrian. Arraioz A taldeak aisa irabazi zuen laxoa txapelketako finala, 9-2 irabazi baitzion Oitz A taldeari. Malerrekakoek lehendabiziko jokoa egin bazuten ere, hurrengo zortziak segidan egin zituzten baztandarrek, eta uste baino lehen erabakia utzi zuten txapela. Oizkoek bigarren jokoa ere egin zuten, baina baztandarren bederatzigarrenarekin, etxekoek hirugarrenez jantzi zuten txapela.
Finaleko jokalari onenaren saria Miurarentzat
Oizko taldeak ez zuen bere egunik onena izan eta, Arraioz, ordea, ederki aritu zen. Jokalarien artean, Iñaki Miura sakatzailearen lana nabarmentzekoa izan zen eta beretzat izan zen Mikel Eizagirre pilotazale donostiarrak ematen duen finaleko jokalari onenaren saria. Berarekin batera, Jon Gamio numeroa eta Jesus Mari Laurnagarai eta Asier Zubigarai laurdenak aritu ziren Arraiozko taldean. Oitzeko taldean, berriz, Sergio Fagoaga, Lander Mendiola, Iñaki Mendiola eta Juan Mari Mindegiak jokatu zuten.
Epaile lanetan, Oizko Joaquin Illarregi, Iruritako Txuma Prim eta Miguel Bidegain, Arraiozko Sotero Etxandi eta Doneztebeko Juan Mari Artazkoz aritu ziren eta Arraiozko Mariano Maritorena izan zen marrazaina.
Sari banaketa
Baztango kirol koordinatzailea den Elixabet Santestebanek eman zizkien sariak txapeldunei eta Sotero Etxandi Arraiozko alkateak txapelak jantzi zizkien.
Urtero bezala, pilota munduko agintari aunitz bildu zituen Baztan Bidasoako Laxoa Txapelketaren finalak. Arraiozen izan ziren Nafarroako eta Kataluniako federazioetako presidenteak, Miguel Pozueta eta Agustin Brugues, hurrenez hurren; baita Pilotarien Batzarreko Juanjo Oronoz eta Josean Arroyo ere, bertzeak bertze.
Hirugarren eta laugarren postuak
Hirugarren eta laugarren posturako lehia finalaren bezperan jokatu zen, abuztuaren 1ean. Irurita A eta Arraioz B taldeak aritu ziren aurrez-aurre eta 9-7ko markagailuarekin Iruritako taldea gailendu zen.
TXAPELDUNAK
|
|
||||||||||||||||||||||||||||||||||||||||||||||||||||||||||||