Berako Gure Txokoako herri kirol taldea bikain ibili zen larunbatean, abuztuaren 1ean, Elizondon burutu zen Nafarroako Herriz Herri txapelketako bigarren jardunaldian.
Lehen konbinatuan nagusi Gure Txokoa
Lehenengo proba konbinatuan, koxkor biltzea, zaku lasterketa, aizkora, korrika eta arpana biltzen duenean, nagusitu egin ziren beratarrak, 18 minutu 34 segundu eta 53 zentesimako denborarekin. Hamar segundu eskaseko abantaila atera zioten bigarren izan zen Basaburuari (18’44”20), kasik minutu erdikoa hirugarren izan zen Berriozarri (19’03”72) eta Igantzi izan zen laugarren (19’13”).
Bigarrenean berdindu Igantzirekin
Bigarren proba konbinatuan edo Hiru Kirolen berriz (lasto botatzea, txinga eramatea eta ingude altxatzea), berdindu egin zuen Gure Txokoak Igantzirekin lehen postuan, hiruna puntu terdirekin. Basaburuak eta Berriozarrek puntu bana terdi atera zuten.
Basaburua eta Igantzi sailkapen buru
Gauzak honela, bi jardunaldi jokatuta, lehen konbinatuan Basaburua da sailkapen buruan, Gure Txokoa bigarren, Berriozar hirugarren eta Igantzi laugarren. Bigarren konbinatuan, aldiz, Igantzi da buru (7,5 puntu), Gure Txokoa bigarren (6,5 puntu), Basaburua hirugarren (3,5 puntu) eta Berriozar laugarren (2,5 puntu).
Hurrengo jardunaldiak
Hirugarren jardunaldia Arantzan jokatuko da abuztuaren 16an eta finala abuztuaren 29an Berriozarren.