Transportes Bidasoa enpresako kamioi bat ebatsi zuten asteartetik asteazkenerako gauean Alkaiagako industrialdean. Hain zuzen, Eugenio Erkizia, 64 urteko garraiolari beratarraren kamioia ebatsi zuten eta berak dioenez, “44 urtez lanean aritu eta kontuz ibili ondotik, etxe atarian lapurtu naute”. Denuntzia Berako Guardia Zibilaren kuartelean eta Hendaiako gendarmerian egin du, kamioia atzerrira eramaten ahal duten susmoa baitu. Telepeajeko txartela erabili dutela badakite, beraz, autopistan barna eraman dute kamioia, baina ez daki nondik. Guardia Zibila, Alkaiagako enpresek dituzten segurtasun kamerak aztertzen ari da, lapurrak zein diren agertuko balitz ere.
Kezka
Lehendik gasoila eta merkantziak ebasten zizkieten eta orain kamioia bera ere bai. Garraiolariak kezkatuak daude. Joan den astean, Bidasoako bertze bazkide baten kamioia ebatsi zuten Usurbilgo industrialdetik. Azken hilabeteetan, Gipuzkoa eta Nafarroako industrialdetan hamar lapurreta baino gehiago izan dira, batez ere industrialdetan eta asteburuan.
Kamioiak erreak
Bertze aldetik, Alkaiaga industrialdean hiru ibilgailu erreak agertu ziren uztailaren 23an. Conde Truth enpresako kabina bat eta bi erremolke ziren. Lehenago, uztailaren 18an ere bertze kamioi-frigorifiko bat erre zuten. Garraiolariak kezkatuak daude, suteak nahita eragindakoak direla uste baita.