Jon Rekondo leitzarrak, Otsagiko Daniel Vicentek, Patxi Mindegia zubietarrak, Oihan Larretxea beratarrak eta Beintza-Labaiengo Xabier Mindegiak jokatuko dute Nafarroako bigarren mailako aizkolari txapelketaren finala. Larunbat arratsaldean jokatu zen Donezteben kanporaketa eta boskote hori sailkatu zen finalerako txartela ematen zuten bortz lehenbiziko postuetan.
Finalerako boskotea
Jon Rekondo leitzarra izan zen bizkorrena eta 54 ontzako bi enborrak eta 60 ontzako enbor bakarra mozteko 7 minutu eta 11 segundu aski izan zituen. 24 segunduko aldea atera zion bigarren izan zen Daniel Vicenteri (7‘35”); hirugarren Patxi Mindegia izan zen (7‘41”), laugarren Oihan Larretxea (7’50”) eta bosgarren Xabier Mindegia (8’25”).
Finaletik kanpo
Finaletik kanpo 7 segundu eskasengatik gelditu zen Beintza-Labaiengo Jexux Etxeberria (8’32”), zazpigarren Etxarri Aranazko Juan Jose Erdozia izan zen (8’43”), zortzigarren Arkaitz Olano leitzarra (8’53”), bederatzigarren Luis Mari Belarra doneztebarra (8’54”), hamargarren Garraldeko Sergio Mandazen (10’27”), hamekagarren Beintza Labaiengo Jon Telletxea (10’46”), hamabigarren Xabier Ariztegi etxalartarra (10’55”) eta hamahirugarren Juan Telletxea doneztebarra (11’52”).
Jautsiera
Hain zuzen bi azkenak, Ariztegi etxalartarrak eta Telletxea doneztebarrak Hirugarren mailara jautsi beharko dute, baina lesio baten ondorioz parte hartu ez zuen David Amillano altsasuarraren kontrako kanporaketa bat eskatzeko aukera izanen dute.