Turismo sektorea indartzeko Nafarroako Gobernuak abiatutako Navarra, Maneras de Vivir kanpainarekin bat egin dute eskualdeko turismo entitate aunitzek. Guztira 76 landa-etxe, hostal, apartamentu, alberge eta hotel sartu dira eskaintza honetan eta alojamendu horiek bisitarien artean, promozioan sartuta dauden baliabide turistikoetarako doako sarrerak eta deskontuak banatuko dituzte. 2009. urte bukaera arte egonen da indarrean neurria. Alojamenduek enpresa hauetako sarrerak edo deskontuak oparituko dituzte: Amaiurko errota, Zubietako errota, Donamariako Jauregia dorretxea, Urdazubiko leizeak, Narbarteko Bidasoa Kultur zerbitzuak, Oronoz-Mugairiko Leurtza abentura., Zugarramurdiko Sorginen leizeak eta museoa, Bertizko Jaurerria Natur Parkea, Oieregiko Basoan zerbitzu turistikoak, Lesakako Burdinaren zentrua, Lesakako 4x4 Bortziriak, Beintza- Labaiengo Gesrural Gestion turística eta Arizkungo Santxotena parke museoa. Gobernuak Nafarroa osoan 1,25 milioi euro inbertituko ditu kanpaina honetan.