Herritik atera eta herrira sartzeko dauden bi bidegurutzeak moldatzeko proiektua Sertecna enpresari agindu zion joan den urtean Nafarroako Gobernuko Herri Lanetako zuzendari nagusiak. Eta orain, proiektua behin behinekoz onetsi eta ukitutako ondasun eta eskubideen zerrenda jakinarazi du Gobernuak. Jendaurrean hilabete batez egonen da udaletxean, alegazioak aurkeztu ahal izateko.
Hegoaldeko bidegurutzea
Gobernutik jakinarazi dutenez, hegoaldeko bidegurutzea, Doneztebe aldekoa, garrantzitsuena da. Gaur egun, Iruñetik Sunbillara doazen ibilgailuek eta herrigunetik Behobiara doazenek errepidea gurutzatu behar dute, bi errailak zeharkatuz. Trafiko haundia izaten da toki horretan eta zati arriskutsua da, hildakoak ere izan baitira tarte horretan. Hala, errepideko bi lerroak ez gurutzatzeko, Iruñetik herrira sartzeko erdiko lerro bat eraiki nahi da. Hartara, biraketa egiten duten ibilgailuek Sunbillan sartzeko lerro bakarra gurutzatu beharko lukete. Behobiara joateko, berriz, azelerazio bidea egitea proposatu da.
Iparraldekoa
Iparraldeko bidegurutzearen kasuan, Irun aldekoan, helburua ezkerreko biraketak kentzea da, errepidea ez gurutzatu behar izateko. Horretarako, ibilgailuak soilik eskuinera biratzera behartuko dira. Beraz, herritik Behobiara ezin izanen da atera bidegurutze horretatik, ezta Iruña aldetik Sunbillara sartu ere. Bertze bidegurutzea erabili beharko da.