Ttipi-Ttapa Telebistaren alde Bortzirietako Euskara Mankomunitateak abiatutako sinadura bilketa bere amaierara ailegatu da. Martxoaren erdi aldera hasi kanpaina bortz herrietan eta geroztik 1.500etik gora sinadura bildu dira. Lerro hauek idazterakoan 1.571 ziren bildutako sinadurak, baina oraindik ez ziren denak zenbatuak.
Sinaduren aurkezpena
Ttipi-Ttapa Telebista berriz ere Bortzirietako etxeetan egoteko eskatuz, Bortzirietako Euskara Mankomunitateak hasi zuen sentsibilizazio, atxikimendu eta salaketa ekimenen barne egin da sinadura bilketa eta hiru hilabete beranduago, kanpainari bukaera emateko, sinadurak aurkezteko bi ekitaldi eginen dira: bat Etxalarren, ortzegun honetan, 19:00etan Kultur Etxean. Bertzea, berriz, ortziralean, ekainak 26, Iruñean, 11:00etan. Bortzirietako Euskara Mankomunitatetik iragarri dutenez, sinadurak Nafarroako Gobernuko Hezkuntza Departamentuan aurkeztuko dira.