Nafarroako Bertsozale Elkarteak antolatuta, 14 eta 18 urte bitartekoen Nafarroako Eskolarteko Bertsolari Txapelketaren finala jokatu zen larunbatean Donezteben. Iaz bezala, Saioa Alkaiza iruindarrak jantzi zuen txapela. Saio dotorea egin zuen Alkaizak eta horri esker iaz Iruñean lortutako lehen postua eskuratu zuen berriro. Txapeldunordea ere iazko bera izan da, Josu Sanjurjo lesakarra. Biek ordezkatuko dute Nafarroa ekainaren 20an Altsasun jokatuko den Euskal Herriko txapelketan.
Hamar bertsolari
Doneztebeko zineman 60 lagun inguru elkartu ziren finala ikusteko eta haien aurrean etorkizun handiko bertsolariak direla erakutsi zuten oholtzara igo ziren hamar gazteek: Saioa Alkaiza, Irati Majuelo, Haizea Beruete, Patxi Castillo, Ioar Tainta, Josu Sanjurjo, Irati Arrieta, Maialen Belarra, Egoitz Gorosterrazu eta Amaia Elizagoien.
Heldu den asteburuan 14 urte artekoak
Manolo Arozena eta Bittor Elizagoien bertsolari beteranoek banatu zituzten sariak: txapeldunaren txapelaz gain, oroigarri bana eta abenduan jokatuko den Bertsolari Txapelketa Nagusiko finalerako gonbidapen bana. Heldu den asteburuan 14 urte arterakoen Nafarroako Eskolartekoen Bertsolari Txapelketaren finala eginen da Larraintzaren, han ospatuko den Nafarroako Bertso Eskolen egunarekin batera.