Ortziral eta larunbatean ospatu zuten Donezteben Errekaren Eguna eta asteburua ezin hobe joan da. Ortziralean, Sanbak Mont Blanc-eko igoeraren ikusentzunekoa aurkeztu zuen Leku-Eder zineman eta giro herrikoi eta mendizalea izan zen. Mus txapelketan berrogei bikote aritu ziren eta horie nartean Jaba eta Juanjo atera ziren txapeldun (urdaiazpikoa eta trofeoak) eta Maite eta Edurne gelditu ziren bigarren (trofeoa eta txuletak).
Kanako enborra 26 minutuan
Halere, egun handia larunbata izan zen. Goizean, eskubaloian ttikienen txanda izan zen eta eguerdian, Oskar Mindegiak gidatzen duen judo eskolakoek ere bere erakustaldia eskaini zuten. Eta zer erran, Juan Telletxea aizkolari eta Errekako presidenteak emandako erakustaldiaz! Kanako enborra (bi metro terdiko diametroa) 26 minutuan moztu du, plaza betetzen zuen jendearen txalo zaparrada artean.
Izarrak nagusitu ziren
Arratsaldeko eskubaloi partidei dagokienez, Errekako mutiko jubenilek galdu egin zuten Lagunak taldearen kontra. Gero, neska jubenilen eta garai bateko taldekideen arteko lehian, gazteak nagusitu ziren juxtu-juxtuan, partida orekatu eta eder baten ondotik. Segidan, Errekako talde nagusiaren eta izarren arteko partida. Izarrek izar direla erakutsi zuten, eta 37-42 irabazi zuten. Taldean, Niko Mindegia eta Ibai Meoki Errekako jokalari ohiekin batera Crowley, Beuchler, Agirrezabalaga, Txokarro, Aldunate, Peciña, Txabarri eta bertze hainbat jokalari handi aritu ziren.
160 lagun afaltzen eta hainbat une hunkigarri
Bestak Santa Luzia Plazan segida izan zuen, 160 lagun bildu baitziren afaltzera. Hemen ere sorpresak izan ziren. Hasteko, Xabi Bañaresek prestatutako ikusentzunekoa, Erreka elkartearen historiari buruzkoa. Txomin Mindegiak Errekaren lana goraipatu zuen eta taldekideek domina bana jaso zuten, aurtengo bigarren postuaren oroigarritzat eta Ibai Mariezkurrenak txapeldunordeen kopa altxatu zuen. Hori gutti balitz, orduantxe agertu ziren plazara Gorka Bidegain eta Iñaki Gurrutxaga, bizikleta gainean Luchon eta Doneztebe arteko 360 kilometroak egin ondotik. Hauek ere eszenatokira igo eta txalo zaparrada ederra jaso zuten.
Errekako banderina Elbruserako bidean
Uztailean Elbrusera joateko asmoa dute Tomas Sanz eta Sanbak Errekaren banderina jaso zuten Juan Telletxea presidentearen eskutik, Europako gailurrean jarri dezaten. Azkenik, Pablo Elizondo Errekako kideari eta urtebetean 35.000 bixita baino gehiago izan dituen elkarteko blog arrakastatsuaren egileari ere omenalditxo bat eskaini zitzaion.