Ikasturte amaierarekin batera, Nafarroako Eskolarteko Bertsolari Txapelketa ailegatu da bere azkenera. Nafarroako Bertsozale Elkarteak antolatuta, 14 eta 18 urte bitartekoen finala larunbat honetan, maiatzak 30, eginen da, Doneztebeko Zineman. 19:00etan hasiko da eta sarrera doakoa izanen da.
Hamar bertsolari
Hamar bertsolari gaztetxo ariko dira taula gainean: Saioa Alkaiza (Iruña), Irati Majuelo (Iruña), Haizea Beruete (Iruña), Patxi Castillo (Bera), Ioar Tainta (Lesaka), Josu Sanjurjo (Lesaka), Irati Arrieta (Sunbilla), Maialen Belarra (Doneztebe), Egoitz Gorosterrazu (Ituren) eta Amaia Elizagoien (Oronoz-Mugairi).
Bi fase
Bi fase izanen ditu saioak. Lehenengoan bertsolari guztiak ariko dira eta honako lana egin beharko dute: gai orokorra emanda bertso bana, zortziko handian bukaera emanda bertso bana eta lau oinak emanda bina bertso. Hortik sei bertsolari sailkatuko dira bigarren faserako eta honako lana egin beharko dute: zortziko handian ofizioka bina bertso, zortziko txikian ofizioka bina bertso eta, azkenik, kartzelan bi ariketa, zortziko txikian puntu bati erantzun eta gaia emanda bertso bana kantatzea.
Ttikienen finala ekainaren 6an Larraintzarren
14 urte artekoen Nafarroako Eskolarteko Bertsolari Txapelketaren finala, berriz, ekainaren 6an eginen da Larraintzarren, Nafarroako Bertso Eskolen egunean.