Ikasleek ingurumenaz solasteko, eztabaidatzeko eta lan egiteko Internet erabiltzea erabaki du aurten Cederna-Garalur elkarteko teknologia berrien arloak, Europe-Direct informazio gunearekin batera. Egunero egiten ditugun gauzek ingurumenean zer eragin izan dezakeen ikusteko web-orria sortu dute, www.diadeinternet.garalur.com.
Mendialdeko lau institutu
Web orri horretan zintzilikatutako informazioa oinarri hartuta, lehiaketa bat ere hasi da, DBHko ikasleei zuzendua. Nafarroako mendialdeko lau institutu parte hartzen ari dira lehiaketa honetan: Doneztebeko Mendaur, Berako Toki Ona, Otxagabiako institutua eta Zangozako Sierra de Leyre institutua.
Lehiaketa bi astez
Lehiaketa bi astez egiten ari da. Maiatzaren 11 eta 13an, Internet-en Eguna aprobetxatuz, eta datozen maiatzaren 22 eta 26an. Ingurumena zaintzeko proposamen sortzaile eta originalenak sarituko dira eta sariak ekainaren 5ean banatuko dira, Europako Ingurumenaren Egunarekin batera. Joan den astean, maiatzaren 11n, Doneztebeko DBHko ikasleekin izan ziren Cedernako langileak eta maiatzaren 13an Otsagabian.