Azkeneko edizioetan bezala, aurtengo Korrikan ere bi kilometro erosi zituen Etxalarrek. Udalak bat eta Altxata Kultur Elkarteak bertzea. Martxoaren 30ean, astelehenean, pasatu zen Korrika Igantziko Bentetatik. Hantxe hartu zuen testigua, 14:50ean, Patxiku Irisarri alkateak. Ondotik, Arantxa Danborienari pasatu zion erreleboa. Altxataren izenean eraman zuen honek testigua, gero, Berako Manttale taldeari uzteko. 20 bat etxalartarrek parte hartu zuten 16. Korrikaren edizioan, bertze herrietako lasterkari guztiekin batera. Giro onak eta umoreak ez zuten hutsik egin.
Eskolako haurrak ere Korrika
Aspaldiko urtetako ohiturari segituz, Landagain Eskolako ikasleek euren Korrika egin zuten. Zikloka banatuta, herri osoan barna lasterka aritu ziren, talde batek bertzeari testigua pasatuz. Plazan akabatu zuten Korrika, jolasean. Berendu ederrak ere ez zuen hutsik egin. Eskolako ikasle guztiek parte hartu zuten, 3 urtetik 12ra bitartekoek.