Carlos Perez-Nievas Nafarroako Gobernuko hezkuntza kontseilariarekin bildu dira astearte goizean Bortzirietako udal ordezkariak, euskarazko tokiko komunikabideen eta Ttipi-ttapa telebistaren aldeko konpromisoa agertzera. Bereziki Ttipi-ttapa telebistaren egoerarekin kezkatuta daude udal ordezkariak. Hori dela-eta, eskaera zehatzak egin dizkiote Hezkuntza kontseilariari.
Dirulaguntza duinak
Honela, Ttipi-ttapa telebistari eta euskarazko komunikabideei diru laguntza duinak emateko konpromisoa eskatu diote, baita komunikabideen egoera erregularizatzeko hitzarmenaren aldeko urratsak egitea. Modu berean, orain arte hutsaren hurrengoa izan den publizitate instituzionala txertatzeko konpromisoa eskatu diote eta Nafarroako Gobernuko gainerako departamentuetan eragitea tokiko euskarazko telebistek lizentzia eskuratzeko aukera izan dezaten, eta betekizun bidegabe eta neurrigabeak bertan behera uzteko (gaztelaniaren derrigortasuna eta eskakizun ekonomiko itzelezkoak). Lizentzia eskuratu bitartean emititzeko bermea izatea ere eskatu diote, egoera behin betiko erregularizatzen duten arte.
Bileraren balorazio positiboa
Eskari hauen aitzinean, Carlos Perez-Nievas Hezkuntza kontseilariak uda ondotik ziurrenik, euskarazko komunikabideentzako dirulaguntza deialdia eginen dutela konpromisoa hartu du eta iazko kopuru bera banatuko dutela, alegia 240.000 euro. Euskarazko telebistak lizentzia eskuratzeko aukera izan dezan lan eginen dutela ere aipatu du eta konpromiso politiko hori bere gain hartu du Pérez-Nievasek. Udal ordezkariek bileraren emaitzaz balorazio baikorra egin badute ere, aurrerantzean gai honi jarraipena eginen diotela berretsi dute.