Apirilaren 12an eginen den Aberri Egunean parte hartzeko deia egin du Bai Euskal Herriari herri ekimenak, eta horrela, etxeetako balkoi, leiho, txoko eta mendi kasko guztietan ikurriñak paratzeko eskatu du. Egun horretan Irun eta Hendaia lotuko dituen martxa eginen da, eta «olatu erraldoiarekin» parte hartzeko deia ere egin dute antolatzaileek: «Euskal Herrian aldaketa politikoa burujabetzarantza eramateko prest diren indar guztiak batu eta aurrera egiteko unea dela uste dugu».