Leitzan eta Goizuetan bezala, Ezkurrako mapa bat egin nahi da eta helburu horrekin, Fernando, Karmele, Juan Jesus eta Pellok herriko lur eremuetan barna itzulia egin zuten martxoaren 20an.
Goizean, 7:00etan abiatu ziren Txantxangorri ehiztarien txabolatik. Perralekuko pistan barna igo ondotik, Olako bordara jautsi ziren, Ittola aldean barna. Inguru horretan Amokonea eta Aierdi borden aztarnei argazkiak atera zizkieten. Malda gogor bat igo ondotik, Katalinea eta Etxeberria artean dagoen baserrian hartu zuten atseden.
Kasteneako borda gurutzatutakoan, Eratsungo lurretan sartu ziren, eta Iruñarriko menhirrera edo iruinarrira ailegatu ziren.
Monumentu megalitiko hau Eratsungoa da, eta hori ongi gogoan dute herritarrek. Bere inguruetan 12 megalito baino gehiago aurkitu dira, baina zoritxarrez, ez zaie kasurik egin.
Ezkurran sartuz, Olegiko harrespilari erreparatu eta Ezkain eta Erakurrira igo ziren. Aipatzekoa da, zenbait mapetan mendi hau Irakurri izenarekin ageri dela, baina herritarrek ez dute inoiz horrela erabili, Erakurri edo Eakurri baizik.
Bideari jarraituz, Urdizko harritik barna Makotsolara jaitsi ziren eta eguerdirako Ollinera ailegatu eta hemengo hondakinak ikusi zituzten.
Ollin, ekonomikoki garrantzitsua
Auzo honek bi garai ekonomiko garrantzitsu eduki zituen. XIX eta XX. mendeetan fluorra, espatua, piritia, beruna eta zilarra bezalako mineralak atera ziren. Lehenagotik, berriz, 1328tik aurrera, bi burdinola jarri ziren martxan eta 1586an euren garairik oparoena ezagutu zuten. Europako iparralderako, Ameriketarako eta militarren itsasontzietarako lan asko egin zen.
Sei ordu eta erdiko buelta
Ibilbideak sei ordu eta erdi iraun zituen, eta gainerako itzulia hurrengo baterako utzi zuten.
Dena den, Leitza, Beruete, Eratsun eta Goizuetarekin dauden mugak berrikusi ahal izan zituzten, eta egunari behar bezalako segida emateko, Goizuetako Umore Ona Elkartean bazkaldu zuten, Juan Ignacio Apezetxea eta bere emazteak prestatutako bazkari eder batekin. Lerro hauen bidez, eskerrik asko.
Bide batez, esan, Nafarroako Kutxaren Zuk aukeratu, zuk erabaki programaren bidez, mapa egiteko dirua bildu nahi dela, baina hori hurrengo urtean izanen da. Mapa ere 2010erako akitua izatea espero da.
Aurten, Zuk aukeratu, zuk erabaki egitasmoarekin 7.950 euroko laguntza jaso nahi da erlojua konpontzeko. Dagoeneko, Ezkurra, Eratsun, Leitza, Doneztebe eta Iruñeko Nafarroako Kutxako 156 bezerok egin dute proiketu honen alde eta eskertzekoa da.