Bidasoaldeko hogeita bigarren Bertsopaper lehiaketa antolatu dute Berako Kultur Batzordeak eta Bortzirietako Bertso Eskolak, Bortzirietako Euskara Mankomunitatearen laguntzarekin, Baztan-Bidasoaldean bizi direnentzat. Jatorrizko, argitaratu gabeko eta bertze lehiaketaren batean saritu ez diren bertsoak onartuko dira bakarrik eta norberak aukeratuko du gaia, doinua eta neurria.
Hiru mailatan banatuak
Parte-hartzaileak hiru mailatan banatuko dira:
A mailan 12 urte arteko haurrek parte hartuko dute eta gutienez bi bertso edo lau kopla osatu beharko dituzte. Sariei dagokienez, lehenbizikoak 75 euro eta oroigarria; bigarrenak 50 euro eta oroigarria eta hirugarrenak 30 euro.
B maila: 12 urtetik 18 urte arteko gazteen bertsoak sarituko dira eta gutienez lau bertso egin beharko dituzte.
Lehenbiziko saria 150 euro eta oroigarria izanen da; bigarren saria100 euro eta oroigarria eta hirugarrena 50 euro eta oroigarria.
C mailan 18 urtetik goitikoek hartuko dute parte eta gutienez 8 bertso egin beharko dituzte.
Lehenbiziko saria 200 euro eta oroigarria izanen da, bigarrena 150 euro eta oroigarria eta hirugarrena 100 euro eta oroigarria.
Maiatzaren 1a arte
Bertsoak maiatzaren 1era arte (ortzirala) bidali beharko dira helbide honetara:
Berako Kultur etxea
Bidasoako XXII. Bertsopaper Lehiaketa
Eztegara pasealekua, 11
31780 BERA (NAFARROA)
Bertsoak onartuak izateko izenburua eta adina eramanen dute bakarrik agerian. Bertze gutun-azal itxi batean bertsoen izenburua paratuko da azalean, eta barrenean egilearen izen-abizenak, adina eta telefonoa.
Sariak maiatzaren 15ean
Epaimahaia Bortzirietako Bertso Eskolak izendatuko du, eta honen erabakia ezin izanen da gibelera bota. Epaimahaiak sariak hutsik utzi ahalko ditu, edo aipamen bereziak eman. Sariak Berako Kultur Etxean maiatzaren 15ean, ortzirala, arratsaldeko 18:00etan eginen den ekitaldian banatuko dira. Sari banaketa ekitaldian eskolarteko Baztan-Bidasoaldeko kanporaketa eginen da.