Senpereko amorroinaren kofradiak haundiki ospatu du bere hogoita bortzgarren urtemuga joan den martxoaren 8an, emazte langilearen egunaren karietarat. Elkarretaratze baten eta mezaren ondotik, Akitania osoko eta Hego Euskal Herriko gonbidatuak Inharrean bildu ziren, Ibarrunen. Andere auzapezak ongi etorria eman zien bildu ziren gastronomiazaleei eta eskertu zuen herriko kofradiak egiten duen lana Senpereko amorroina ezagutarazteko auzo lurraldeetan barna. Gisa hortan, Christine Bessonartek erran du Turismo Bulegoak eta kofradiak elkarlana haundituko dutela. Hemendik goiti, Senpereri buruzko informazioa eta iragarkiak banatuko ditu kofradiak urte osoan egiten dituen bidaien eta bisiten karietarat. Ondoko urteetan, proiektu berriak elgarrekin egitea ez du baztertzen Peio Aincy turismoaz arduratzen den herriko kontseilariak.
Hogoita bortzgarren bestan bildu ziren gonbidatuen izenak aditzean jateko eta edateko gogoa etorri zitzaion bat baino gehiagori...Bidarteko txipiroia, Ezpeletako piperra, Bidasoako izokina, Beasaingo odolkia, Tolosako babarruna, Madiran, Baionako xingarra… denak ekoizpen onak eta aipamen hutsak gosea ematen dutenak! Lehen aldikotz, Kanboko euskal pastizaren kofradiak parte hartu zuen Senpereko biltzarrean.
Akitaniako kofradiak ezagutarazteko liburu bat eta diska bat plazaratu dute Jean-Pierre Aren kazetariak eta David Olaizola kantariak: Les Chevaliers d’Aquitania. Obra huni esker, Akitaniako bortz departamentuetako 62 kofradiak ezagutu daitezke, hauen artean Senperekoa. Lan hau berriki agertu dute publikoki Parisko laborantza gelan.