Jendea ez dago geldirik egoteko atzeneko boladan herrian. Eta ederki aprobetxatu du hondarreko on aldia; eguzkia agertu orduko barakuiluak bezala atera dira herritarrak kanpo lanera: bateko hesia konpondu behar dela, sasiak erre behar direla, besteko adarrak moztu behar direla, ongarria ere atera behar...; izaten da tenore honetan zer egina. Bildotsak ere ibili dira soroetan fantasia ederrean saltoka. Komeni da eguraldi ona aprobetxatzea daramakigun negua ikusi eta gero.
Esaerak dioenez, urriko ilberrian zurituz gero, ondoko zazpi ilberrietan zuritzen omen du, eta martxoko ilberria ere gainean dugu. Erne oraindik; udaberrian ere badaki gogotik elurra egiten!