Nafarroako Herri Kirol Federazioak Nafarroako Kirol Institutuarekin batera antolatutako Herri Kirol Jolasak txapelketa igande honetan, martxoaren 1ean, hasiko da Etxarri Aranazko frontoian, goizeko 11etatik aitzinera. Herri Kirol Jolas hauetan hiru kategorietako neska-mutilak hartzen dute parte: kimu edo alebin mailakoak (11-12 urte), haur edo infantil mailakoak (13-14 urte) eta kadete mailakoak (15-16 urte). Haur eta Kadete mailetan bi txapelketa egiten dira Soka-Tira eta Proba Konbinatua (koxkor biltzea, zaku lasterketa, txinga-eramatea, korrika eta arpana modalitateak biltzen dituena).
Alebin mailan, Basaburua, Igantzi eta Arantzako neska-mutikoek beteko dute eskualdeko ordezkaritza
Alebin mailako haurrek berriz Proba Konbinatuko Txapelketa bakarrik izanen dute, baina arpana modalitatea ez da sartzen. Alebin maila honetan 9 talde lehiatuko dira: Berriozar A eta B, Ultzama, Baztango Basaburua, Igantzi, Arantza, Etxarri Aranazko Andra Mari eta Trumoiak eta Altsasuko Iñigo Aritza.
Haur eta kadete mailan Basaburuak bakarrik
Haurren proba konbinatuan lau talde izanen dira: Berriozar, Ultzama, Basaburua eta Andra Mari. Sokatiran, berriz, hiru izanen dira, Ultzamak ez baitu parte hartuko. Kadete mailako proba konbinatuan Basaburua, Etxarri Aranazko Andra Mari eta Putterri eta Txantrea lehiatuko dira eta sokatiran, aipatutako lau talde hauetaz gain, Altsasuko Iñigo Aritza ariko da.
Egutegia
Igandean Etxarri Aranatzen eginen den sainaren ondotik, martxoaren 8an Larraintzarren jokatuko da bigarren jardunaldia, martxoaren 15ean Altsasun hirugarrena, martxoaren 22an Berroetan laugarrena (euria eginen balu, Iruritan) eta finala Berriozarren jokatuko da apirilaren 5ean.