Turismo Bulegoak emandako zenbakien arabera, 2008ko urteak berretsi du 2006az geroztik ez direla turista gehiago etorri Sara aldera. Azken hiru urteak berdintsuak izan dira. Aitzineko urteetan bisitarien kopurua beti handitzen joan zen, baina orain, turismoaren garapena gelditu egin da.
2008an 19.024 lagun errezibitu zituzten Turismo Bulegoan, aitzineko urtean baino zertxobait gutxiago, orduan 19.191 izan baitziren informazio eske joan zirenak.
Turista gehienak agorrilean etortzen dira, eta ondotik uztaila da jende gehien hartzen duen hilabetea, baina bien artean diferentzia pixka bat bada. Agorrilean 2.692 lagun pasa ziren Turismo Bulegotik, eta uztailean 2.006. Buruilean 968 izan ziren, eta apirilean, maiatzean eta eriaroan 700-800 bat.
Beti ere Turismo Bulegoko datuen arabera, alokairuek behera egin dute. Aldiz, bisita gidatuek, izan herrikoak edo izan elizako ezkilara joatekoek, gora egin dute. Halere, Turismo Bulegoak ez du ondorio txarrik atera, haren ustez, beherakada orokorra normala delako, denbora ezegonkorra izan delako, eta norberaren bakantzetarako dirua murriztu delako.