«Ttipi-Ttapa Telebista itxi digutela!». Obama eta zikloiaren kontuekin batera, seguru aski hau izanen da gure herrietan gehien aipatu den gaia.
Berri honek ez gaitu ezustean harrapatu, baina haserre haundia sortu digu: otsailaren 1az geroztik ezin ditugu gure herrietako berriak ikusi, ezta aste hondarretan gure zonaldean egiten diren kirolen emaitzak ere, kultur-agenda ere ezin ikusi, talde ezberdinek antolatzen dituzten ekitaldien berri ere ez dugu… eta hainbat eta hainbateko bertze konturik ezta ere.
Eta hau gutxi ez balitz ere, Ttipi-Ttapa galtzearekin batera telebista euskaraz ikusteko aukera urrietatik bat galdu dugu. Lehen ere leiho gutxi zituen etxeari, bertze bat itxi diote. Horretaz gain, badirudi azkeneko leihoa ere kolokan daukagula (ETB 1). Ilunpean gelditzeko puntuan gaude.
Beharbada euskaldun ez den batek garrantzi txikia emanen dio aipatzen dugun azkeneko honi, baina guretzat zer den jakiteko, gure tokian paratzea eskatuko genieke: nola sentituko ote zen bere hizkuntzako telebistarik gabe geldituko balitz…
TDTrako kontzesio gabe gelditu dela, Nafarroako Gobernuko laguntza urriak ia-ia deusetan gelditu direla, honetarako dirurik ez dagoela… gauza da gu Ttipi-Ttapa Telebistarik gabe gelditu garela.
Bortzirietako Toki Ona Institutuko Guraso Elkartetik hedabide honek egin duen lan haundi eta garrantzitsua eskertu nahi du. Ttipi-Ttapa Telebista gurekin berriz izanen dugulako esperantza ez dugula galtzen azpimarratu nahi dugu.
Eta itxiera honen errudunari gure protesta gogorrena adierazi nahi diogu.
Toki Ona Institutuko Guraso Elkartea