Nafarroako Gobernuko Herrilan, Garraio eta Komunikabidetako Departamentuak jakinarazi duenez, urtarrilaren 19tik 22ra berriz ere leherketak izanen dira N-121A errepideko zabaltze eta egokitze lanen barrenean eta horregatik, mozketak izanen dira.
Astelehenean, asteartean eta ortzegunean
Mozketa guziak Nafarroako aldean, Endarlatsa-Bera tartean izanen dira, 67 eta 68 kilometro inguruetan. Asteko lehen mozketa astelehenean, urtarrilaren 19an izanen da eta ordubeteko iraupena izanen du, 12:30etik 13:30era. Asteartean, urtarrilaren 20an, luzeagoa izanen da mozketa, lau ordu ingurukoa eta eguerdiko 12:30etik arratsaldeko 18:30era iraun dezake. Ortzegunean, urtarrilaren 22an ere, Endarlatsa-Bera zatiko 67garren kilometro inguruan, bi orduko mozketa izanen da, 12:30etatik 14:30era.
Txandakako pasabidea
Bertze aldetik, N-121A errepideko zenbait zatitan txandakako bidea emanen da 24 ordutan, egunez seinalisten bidez eta gauez semaforoen bidez. Honela, Endarlatsa-Bera zatian, 69garren kilometro inguruan, Berrizaun inguruan 58garren kilometro inguruan eta Bera-Etxalar zatian, 61 eta 62garren kilometroen inguruan txandaka emanen da bidea.
Horregatik, bidai luzea dutenek A-15 autobidea erabiltzea eta bertzenaz, ordezko bideak aukeratzea aholkatu dute Nafarroako Gobernutik, baita kontuz eta seinaleak errespetatuz ibiltzea. Nafarroako errepideei buruzko informazio eguneratua topatu daiteke www.cfnavarra.es/obraspublicas web orrian edo 900 400 100 doaneko telefono zenbakian.