Azken pausoak ematera doa Malerrekako Agenda 21. 2007an ekin zion Terra-Prometeako lantaldeak Agenda 21 egitasmoa osatzen duten bi faseetan lehenari: diagnosiari. Diagnosia osatuta, Malerrekaren etorkizunerako garrantzitsuak diren proiektuei forma ematen aritu ziren gero. Orain, bada, garrantzitsuak izan daitezkeen proiektuen zerrenda prest dute Terra-Prometeako teknikariek. 57 ekintza zehaztu dituzte eta horien berri eman zuten asteazkenean, urtarrilaren 14an, Donezteben egindako bilera. Lehentasunaren arabera ordenatzen ari dira orain.
Mankomunitatea bizkortzea
Malerrekaren antolamendua hobetzeko neurriak hartzea da zerrenda horretako neurri bat, mankomunitate bezala bizkortzea, alegia. Kultura sustatzea ere garrantzitsua ikusten dute: kultur teknikaria kontratatu, kultur ekitaldiak elkarlanean antolatu, euskararen erabilera indartzeko neurriak hartu...; horrekin batera, parte-hartzea eta elkarlana sustatzearen aldekoak dira, auzolana, web orri bateratua eta gisako ekimenen bidez. Hirigintza alorra planifikatu, etxebizitzen arazoari aterabidea eman eta industria garatzea heldu diren hirurteetako helburuen artean daude.
Hezkuntza, errepideak eta ingurumena
Hezkuntza eta heziketa alorrean ere hainbat gabezia somatu dira eta hainbat proposamen daude: haurtzaindegia edo haur eskola egin; hezkuntzako eraikinak hobetu; gazteek ikas dezaten motibazioa indartu; etorkinen integrazioaren alde lan egin…
Bigarren mailako errepideen egoera ere hobetu nahi da, eta horrez gain, Mugikortasun Plana ere egin nahi da trafikoa arautzeko.
Ingurumena zaintzearen aldeko proposamenak ere ageri dira ekintzen zerrendan, kaltegarriak diren inpaktuak kontrolatuz eta biodibertsitatea zainduz.
Osasuna, gizarte zerbitzuak eta hondakinen kudeaketa
Osasun eta gizarte zerbitzuak hobetzeko neurriak hartzea ere lehentasunen artean daude. Horren harira, Gizarte Ongizatearen kontseilua martxan paratzea planteatu da.
Hondakinak hobeki kudeatzea eta etxeko konpostajea indartzea ere garrantzitsuak dira, baita saneamendua eta ura kontrolatzea ere.
Turismoa eta eskualdeko merkataritza eta ostalaritza ere bizkortu nahi dira, bertze zenbait ekintzen artean.