Azken asteetan zenbait hedabidetan agertutako informazioa argitzeko, Baztan-Bidasoako Aralarrek ukatu egin du N-121A eta N-1 errepideetan edo A-15 autobidean bidesaririk jartzeko proposamenik egin duenik. Bidesaria autobidean eta N-121An paratzea Gipuzkoako Foru Aldundiaren asmoa dela nabarmendu du Aralarrek, hau da, EAJ eta EArena. Aralar, bere aldetik, autopistetan bineta soziala paratzearen aldekoa da, A-8 eta AP-1ean, ez, ordea, N-121An. Suitzan, adibidez, erabiltzaileek 25 euro ordaintzen dute urtean, nahi adina ibiltzeko. Hori ibilgailu arinen kasuan izanen litzateke, eta 3,5 tonatik goitikoetan, orain arteko beherapen sistemarekin jarraitzea proposatu du Aralarrek.