Egun gutti falta dira 2008ari aio errateko, eta horren aitzakian, urtero bezala, hainbat ekitaldi izanen dira herrian. Lehenbizikoa abenduaren 24an eginen da, Olentzeroren etorrerarekin. Aspaldiko ohiturari segituz, ilunabar aldera kalejira eginen da Olentzeroren irudiarekin. 18:00-etan meza izanen da, eta ondotik, trikitilari, txistulari eta koruko abeslariekin batera, auzoz auzo ibiliko da Olentzero, geldialdi ttikiak egin eta Eguberrietako abestiak kantatuz. Akabatzeko, luntxa izanen da Elutsa ostatuan.