Baztan-Bidasoako gasbidearen lanen hasieraren aurkezpen ofiziala egin dute ortziral eguerdian Donezteben. Lan hauekin, Sunbilla, Legasa, Narbarte, Oieregi, Doneztebe, Oronoz-Mugairi, Arraioz, Irurita, Elbete eta Elizondora ailegatuko da gas naturala. Gaur egun Irunetik Lesakaraino heldu den gasbideari segida emanen zaio honela eta Lesakatik Elizondora bertze 33 kilometro terdiko eraikiko dira, Espainiako Industria, Turismo eta Komertzio Ministerioak, Nafarroako Gobernuak eta Gas Navarra enpresak sinatutako hitzarmenari esker.
Nafarren %27ak erabiltzen du gas naturala, Europako banaz bertzekotik goiti
Lanen hasierako ekitaldi honetan, Jose Maria Roig, Nafarroako Gobernuko Berrikuntza, Enpresa eta Enplegurako kontseilaria, Antoni Peris, Gas Natural enpresako Negozio Arautuen zuzendari nagusia eta Javier Lara, enpresa honetako Garraio Proiektuen arduraduna izan dira, eskualdeko herrietako hainbat alkate, zinegotzi eta Gas Navarrako bertze zenbait agintarirekin batera. Solasaldien txandan aipatu denez, nafarren %27ak dauka gas naturala lehenbiziko hornigai bezala, Espainia osoko eta Europako kopuruetatik goiti.
2.400 familiei zerbitzua emanen die gasbide berriak
Obra ingurura bixita ere egin da eta langileak gas hodia soldatzen ari ziren bitartean, Nafarroako Gobernuko eta udal agintariek argazkiak ateratzeko aprobetxatu dute, lanen inguruko jakingarriak elkartrukatzen zuten bitartean. Orain hasi eta hamar hilabeteko epean lanak akautzea espero da eta heldu den urteko uda aldera gas naturala eskura izanen dute arestian aipatutako herrietako 2.400 familiek eta hainbat enpresek. Lanak lau lekutan hasi dira: Lesakan, Igantzin, Sunbillan eta Donezteben. 8,7 milioi euroko inbertsioa eginen da eta Nafarroako Gobernuak 3,8 milioi euro paratuko ditu.