Zugarramurdiko historiaren tarterik ilunena, 1610. urtean Inkisizioak jazarturiko eta epaituriko ustezko sorginak, Gasteizen dagoen Arabako Artxibo Historiko Probintzialean ezagutu daiteke 2009ko urtarrilaren 12a arte zabalik izanen den “Sorginak! Inkisizioaren artxiboak eta Zugarramurdi” erakusketan, Zugarramurdiko Udala eta Sorginen Museoa instituzio horrekin elkarlanean aritu dira erakusketa prestatzen.
Sorgin ehizari buruzko dokumentuak
Aurkezpenean, Gloria Sanchez, Arabako gobernuko subdelegatua, eta Jose Antonio Sainz, Arabako Artxibo Historiko Probintzialeko zuendaria denak, duela 400 urte Zugarramurdin hasi eta Euskal Herrian barrena hedatu zen sorgin ehizari buruzko dokumentuak ikusgai dituen erakusketa honen gorabeherak azaldu dizkigute.
Testuinguru historikoa eta sinismenen mundua
Ekintza honen bidez, Arabako Artxibo Historiko Probintziala sorginkeria eta Euskal Herrian Inkisizioak izan zuen eraginean barneratzen saiatuko da, testuinguru historiko eta sinismen mundu batean, 1609-1614 urte bitartean, milaka lagun sorgintzat hartu eta hoietako batzuek sutan erre izandako garai hura. Horretarako, eszenografia birkreazioak, multimedia eta hainbat proiekzio izanen dira, bisitariak erakusketaren edukian hobe barneratu ahal izateko.