Nafarroako Gobernuko Herrilan, Garraio eta Komunikabidetako Departamentuak jakinarazi duenez, irailaren 22tik 28rako aste honetan ere zenbait egunez mozten ari dira N-121A errepidea, zabaltze eta egokitze lanen barrenean leherketak egin behar direlako.
Endarlatsa inguruan
Endarlatsa inguruan, Gipuzkoako aldean, errepidea erabat moztu zen astelehen eguerdian, ordu erdi batez, 12:00etatik 12:30era, 72garren kilometro inguruan. Asteartean, irailaren 23an, eguerdiko 12:00etatik ordubietara, bi orduz moztuko da Nafarroa aldean, 67garren kilometroaren inguruan. Asteazkenean, irailaren 24an, berriz ere Gipuzkoako 72. Kilometro inguruan eginen da leherketa eta bi orduz itxiko da errepidea, 12:00etatik 14:00etara. Ortziralean, irailaren 26an, Nafarroa aldeko 68garren kilometro inguruan eginen da leherketa eta bi orduz erabat itxiko da errepidea, eguerdiko 12:00etatik ordubietara.
Bera-Etxalar zatian
Bera-Etxalar zatian, bortz minutuz erabat itxi dute errepidea astelehenean eta bertze horrenbertze eginen dute asteazkenean, irailaren 24ean, 13:00etatik 13:05era.
Berrizaun inguruan
Berrizaun inguruan, azkenik, ordu erdi batez erabat moztuko da errepidea asteartean eta ortzegunean, irailaren 23an eta 25ean, eguerdiko 12:00etatik 12:30era.
Txandakako pasabidea
Egunero bezala, bertze hainbat zatitan txandakako pasabidea emanen da, batzuetan seinaleen bidez eta bertzeetan semaforoen bidez, errepide honetako obrengatik, goizeko 8:00etatik arratsaldeko 19:00etara. Horregatik, bidai luzea dutenek A-15 autobidea erabiltzea eta bertzenaz, ordezko bideak aukeratzea aholkatu dute Nafarroako Gobernutik, baita kontuz eta seinaleak errespetatuz ibiltzea. Nafarroako errepideei buruzko informazio eguneratua topatu daiteke www.cfnavarra.es/obraspublicas web orrian edo 900 400 100 doaneko telefono zenbakian.