Nafarroako Adopzio Familien Elkarteak eta Doneztebeko Udalak antolatutako “Beraien begiraden mundua” argazki erakusketa zabalik dago irailaren 16tik 23ra Doneztebeko Alhondiga erakusketa aretoan. Erakusketa arratsaldeko 18:00etatik 20:00etara irekiko da egunero, baina igandean itxia egonen da.
Irailaren 25etik urriaren 2ra Elizondon
Irailaren 25etik urriaren 2ra, berriz, Elizondoko Arizkunenea Kultur Etxeko lehen solairura eramanen dute erakusketa hau, Baztango Udalaren laguntzarekin. Elizondon egunero irekiko da erakusketa, arratsaldeko 18:00etatik 20:30era eta han ere igandean itxiko dute.
Nafarroako Adopzio Familien Elkartetik jakinarazi dutenez, gero Bera edota Lesakara eraman nahi lukete erakusketa.
2004an sortutako elkartea
Nafarroako Adopzio Familien Elkartea (AFADENA) 2004ko martxoan sortu zen, adopzioaren aitzinetik nahiz ondotik sortzen ahal diren arazoetan familiei laguntzeko. Azken finean, elkartearen helburua haurrak zoriontsu izatea da, modu horretan familiak ere zoriontsu izanen direlakoan. 2005ean hamar familia ziren elkarteko bazkide, 2006an hogei eta 2007an berrogei. Urtero-urtero kopurua bikoizten dela kontuan hartuz, 2008 urte akabailan laurogei familietara ailegatzea espero dute.. Urtero familien arteko topaketak eta bertzelako ateraldiak egiten dituzte. Topaketa horietako bat Bertizen egin zuten 2006ko ekainean.