Hego Euskal Herri osoan bezala, Doneztebeko Enplegu Bulegoan ere goiti egin du langabeziak. Uztailean beheiti egin zuen arren, abuztuan goranzko joera hartu du eta %5,68 igo da. Gainera, Hego Euskal Herriko igoera portzentajeen gainetik dago Doneztebeko bulegokoa: %4,98 igo da Araban, %4,02 Bizkaian, %3,16 Gipuzkoan eta %2,16 Nafarroan.
Nafarroako Gobernuko Enplegu Zerbitzuak emandako datuen arabera, guztira Nafarroan 25.458 langaberekin bukatu zen abuztua. Horietatik 14.016 emakumeak dira eta gainerako 10.442ak gizonezkoak.
Langabezia sektoreka aztertuz, eraikuntzan, merkataritzan, bertzelako enpresa-jardueretan, ehungintza eta korreo nahiz garraioan egin du Nafarroan goiti langabeziak. Aitzitik, beheiti egin du elikaduraren industrian, nekazaritzan eta lehendik lanik gabe zeudenen artean.
Sexuari dagokionean, berriz, emakumeek jarraitzen dute langabezia-tasa altuenarekin. Halere, igoera gizonetan altuagoa izan da, %2,92koa, hain zuzen. Emakumezkoetan %1,59koa izan da.
Adin tarteei dagokienez, 25 urtetik beherakoen artean 2.592 langabe zenbatu ziren abuztuan. Uztaileko datuekin konparatuz %3,80koa izan da gorakada. 25 urtetik goitikoetan, berriz, igoera %1,96koa izan da. Adin tarte honetan, 21.866 langabe erregistratu ziren abuztuan.