Igande honetan, abuztuaren 24an eginen da kontrabandisten lasterketa Saran. Pixkanaka-pixkanaka mende erdira hurbiltzen ari da, aurtengoa berrogeita bosgarrena izanen baita. 18 herrik parte hartuko dute, bakoitzak bi ordezkarirekin. Abiatzea arratsaldeko 17:00etan eginen da Sarako plazatik.
Lehen kilometro terdian zakua bizkarrean
Lehen kilometro eta erdian, gizonek 8 kiloko zakua eraman beharko dute, eta emakumeek 4 kilokoa. Zazpi Fagoetako itzulia egin ondotik, berriz hartu beharko dute Aldunzaharreko parean. Lasterketak 9 kilometro ditu, eta parte-hartzaileek nahitaez lehengo moduan jantzi beharko dute. Azkeneko bi urteetan Fernando Etxegarai beratarrak irabazi du eta 2006an gainera, probako errekorra ezarri zuen, 38 minutu eta 36 segundoko denborarekin. Garaipena eskuratu zuen azken saratarra Ramuntxo Lamothe izan zen orain dela 3 urte. Orduan bere bosgarren garaipena izan zen eta Ramuntxo da Sarako lasterketa gehienetan irabazi duen korrikalaria. Lau garaipen dituzte Irungo Ricardo Torok eta Ezpeletako Gabi Etxart-ek eta hiruna dituzte Fernando Etxegarai beratarrak, Mixel Larzabal saratarrak eta Barraka lesakarrak.
39 aldiz parte hartuak
Aipagarria da Michel Lartigauk eta Ricardo Torok 39 aldiz parte hartu dutela Sarako Kontrabandisten lasterketa honetan. Iaz, Fernando Etxegarairen gibeletik, Patxi Irazoki igantziarra eta Iñigo Lasaga etxalartarra sailkatu ziren.
1961eko lehen edizioan 25 kiloko zakua
Erran beharrik ez da ikusle aunitz biltzen direla proba berezi hau ikustera. 1961ean, lehenbiziko edizioan, partehartzaileek 25 kiloko zakua eraman zuten eta Urruñako Louis Belhart nagusitu zen.