Baztan-Errekako Laxoa txapelketako final larudenetako itzuliko partida batzuk jokatu ziren joan den aste hondarrean. Halere, Oitz A eta Doneztebe Dren arteko partida gibeleratu egin zen eta beraz, oraindik erabaki gabe daude finalerdiak. Oitz A izanen da faborito, Donezteben 7-9 irabazi zuelako eta itzuliko partida herriko plaza berezian jokatuko duelako, baina ikusi egin behar.
Doneztebe A eta Irurita A nagusitasunez
Bertze partidetan ez zen ezusterik izan. Doneztebe A eta Bren arteko itzuliko partida joanekoa baino lehenago jokatua zuten. Bietan 9-4 nagusitu zen Doneztebe A taldea eta finalerdietarako lehen sailkatua zen. Asteburu honetan, bereaz, Irurita A eta Oitz Bren arteko partida jokatu zen. Baztandarrek hutsean utzi zituzten Malerrekakoak eta joanekoan ere 2 eta 9 irabazi zutenez, finalerdietan izanen da Irurita A.
Iruritarren arteko finalerdia
Gainera, Iruritako talde bat seguru izanen da abuztuaren 3an Doneztebeko plazan jokatuko den finalean. Izan ere, Irurita Bk 9 eta 2 irabazi zion Arraioz Ari final laurdenetako itzuliko partidan. Joanekoan ere 4 eta 9 irabazi zutenez, Irurita B izanen da finalerdian eta Irurita A izanen du arerio. Hasierako fasean multzo berean egokitu ziren eta Irurita A nagusitu zen bi partidetan, baina ikusi beharko finalerdian.
Doneztebe A esperoan
Beraz, Doneztebe A taldea finalerdirako arerioaren esperoan dago orain. Oitz Ak abantaila dauka, baina Doneztebe D ere txartelaren bila saiatuko da.