1 eta 3 urte arteko umeentzako Udal Haur Eskola abiatuko da heldu den ikasturtean Malerrekan eta bertan izen emateko epea zabaliko dago uztailaren 7tik 31ra. Horretarako, Doneztebeko udaletxera joan behar da, Haur Eskola Doneztebeko Udalak zuzenean kudeatuko baitu Malerrekako Mankomunitatearentzat.
46 umerendako lekua
Heldu den azaroan edo abenduan ekinen dio ibilbideari Udal Haur Eskolak. Elizagibela auzoan dago Udal Haur Eskola berria, pisu tutelatuen behealdean, eta hasiera batean 46 hartuko ditu: 32 haur handien gela bikoitz batean eta 14 haur gela konbinatu batean.
Goizeko 9:00etatik arratsaldeko 17:00etara
Bertan, haurrari dagozkion esperientzia eta garapena landuko dira. Lan-metodologiari dagokionez, haurrentzako interesa eta esanahia duten jarduera globalizatuak eskainiko dira, esperientzian, jolasean, afektibitatean eta konfiantzan oinarriturik. Eskolaren ordutegia goizeko 9etatik arratsaldeko 17:00etara izanen da. Dena den, gurasoen beharren edota lehentasunen arabera egonen dira haurrak eskolan.