Behatokiak eta Nafarroako 33 alkatek erregistro zibilak euskaraz egin ahal izateko baliabideak eskatu zituzten ekainaren 18an Nafarroako Diputazioaren atarian. Erregistroetako inskripzioak euskaraz egiteko programa informatikoaren euskarazko bertsioa eskatu zuten. Izan ere, uda baino lehen erregistroetako inskripzioak modu informatizatuan egiten hasteko asmoa du Gobernuak, eta horretan euskara aintzat hartzea nahi dute hainbat herrik.
Eskaera egin duten udalerriak
Hauek dira Gobernuko Lehendakaritza, Justizia eta Barne Kontseilariari zuzendutako eskaera-gutuna sinatu duten udalerriak: Anue, Araitz, Arano, Arantza, Arbizu, Areso, Arruazu, Basaburua, Betelu, Bera, Baztan, Beintza-Labaien, Bertizarana, Donamaria, Ergoiena, Etxalar, Goizueta, Igantzi, Imotz, Irurtzun, Lakuntza, Lantz, Larraun, Leitza, Lekunberri, Lesaka, Oitz, Olazti, Orbaitzeta, Orbara, Uharte-Arakil, Urrotz eta Zubieta. Horiez gain, bertze zenbait herritatik gutuna zuzenean igorri dute aipatu Departamentura.