Nafarroako Foru Poliziak Berako Zalain Transformados S.L. enpresa salatu du olio-isuri bat tarteko. Ekainaren 4tik 5erako goizaldean gertatu zen isuria, 6:00ak aldera. Antza, makina bateko depositu batetik olio hidraulikoa lurrera erori zen, eta olio hori arketa baten bidez, euri-kolektorera joan zen, eta hortik Bidasoa ibaira. Isuriaren ondorioz, Foru Poliziak, Oronoz-Mugairiko suhiltzaileek eta Nafarroako Gobernuko Landa Garapen eta Ingurumen Departamentuko teknikoek isuria gertatu zen lekura joan behar izan zuten.
Aitor Etxarriren galdera Parlamentuan
Horren harira, Aitor Etxarri NaBai taldeko legebiltzarkideak ekainaren 11n galdera luzatu zion Nafarroako Parlamentuko Ingurumen Batzordeari. Isuriaren kopurua zenbatekoa izan zen, eta eragindako ondorioak zenbaterainokoak izan diren argitzeko eskatu zion Etxarrik, eta gertatutakoari buruzko akta eta txostenen kopia emateko ere eskatu zuen. Zalain Transformadosek isuna jaso lezake ikerketaren amaieran.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!