Joan den asteburuan eguraldiak sobera lagundu ez bazuen ere, Baztan-Errekako laxoa txapelketako zortzigarren jardunaldiko hainbat partida jokatu ziren.
A multzoan
A multzoan, Arraioz Bk 4 eta 9 galdu zuen Doneztebe Cren kontra Elizondon. Irurita Ak 9 eta 1 irabazi zion Doneztebe Bri eta Doneztebe Ck 4 eta 9 galdu zuen Irurita Bren kontra, zazpigarren jardunalditik gibeltutako partidan. A multzoko partida bakarra gibeleratu zen, Oitz A eta Irurita Bren artekoa.
B multzoan
B multzoan, Doneztebe Dk 7 eta 9 galdu zuen Irurita Cren kontra. Asteburuko partidarik gogorrenean, Elizondon, Arraioz Ak 9 eta 8 irabazi zion Doneztebe Ari eta Irurita Ck 3 eta 9 galdu zuen Oitz Bren kontra, zazpigarren jardunalditik gibeltutako partidan. Multzo honetan ere partida bakarra gibeleratu da aste hondar honetan, Hondarribia eta Oitz Bren artekoa. Oiztarrak 1 eta 3 irabazten ari zirela gibeleratu zen partida.
Final laurdenetako taldeak kasik erabakiak.
Lehen fase hau aitzinera doaiela, final laurdenetara sailkatuko diren taldeak zehazten ari dira: A multzoan Irurita A eta B eta Oitz A taldeek segurtatua dute sailkapena eta laugarren txartela Doneztebe Brentzat izanen da seguruenik. Doneztebe Ck badu oraindik aukeraren bat eta Arraioz B kanpoan geldituko da, partida guziak galdu baititu. B multzoan ere Doneztebe A, Arraioz A, Doneztebe eta Oitz B sailkatuko dira zuzenbidean eta Irurita C eta Hondarribia kanpoan geldituko dira. Beraz, orain multzo bakoitzeko sailkapenak eta ondorioz, gurutzaketak nola gelditzen diren erabakitzea falta da.