Doneztebeko Udaberriko feria bigarren aldiz ospatu da ortziralean, maiatzaren 9an, Doneztebeko Udalak, Nafarroako Gobernuaren eta Cederna-Garalur elkartearen laguntzaz antolatua. Goizeko 11etatik eguerdiko ordubata terdietara bigarren ahari lehiaketa egin da Merkatu Plazan. Lehiaketa honetan, Malerrekako latxa arrazako ahariek parte hartzen ahal dute eta aurten 20 buru aurkeztu dira. Hori bai, lehiaketa ahare mutur gorri eta beltzendako irekia baldin bazegoen ere, gorriak bakarrik aurkeztu dira. Baztanen ugariagoak dira mutur beltzak baina Malerrekan, Donamaria eta Gaztelun bakarrik daudela aipatu digute artzainek.
Lehen saria Sunbillako Pixarnekobordara
Aziendak aurkezten dituzten baserritarrei 30 euro eman zaie parte hartzeagatik. Beraz, sei sari banatu beharrean, hiru bakarrik banatu dira, ahari mutur gorri onenendako. Lehen sailkatua Sunbillako Pixarnekobordako Jose Bernardo Bazterrikaren aharia izan da eta 120 euro eskuratu ditu sunbildarrak. 70 euro bigarren saria Iturengo Sunbilleneako Jose Ignacio Berak eskuratu du eta 50 euro hirugarrena saria Iturengo Arroseneako Maribi Elizalderentzat izan da. Aurtengo lehiaketako irabazle izanen zela jakin baino lehen, Jose Bernardo bazterrika sunbildarrarekin izan gara. Oraindik ez zuen sarien berririk, baina gustora zegoen Doneztebera eramandako bi buruekin. Jendeak ere gustoko zituen eta sariren bat etxerako espentza bederen bazuen.
Behi, aretxe, zaldi, behor eta pottokak ere
Baina dena ez da ahari lehiaketa izan eta azienda feria polita gelditu da goizean. Errate baterako, Andoni Mendiburu tratanteak gainean ibiltzeko eta mendirako zaldiak eraman ditu Merkatu plazara, baita behiak bere aretxeekin ere. Gustora zegoen goizeko martxarekin.
Eskulangileen erakusketa
Goizeko 10etatik eguerdiko ordubietara, eskualdeko artisauen lanen erakusketa eta salmenta ere izan da. Berez, Merkatu Plaza ondoan egotekoak ziren, baina euriaren beldun, elizatarira eraman dituzte. Erakusketa honetan parte hartu dute Urrozko Bittoriano Arzuagak, bere artile-lanekin; egurra lantzen zuten Santiago Hualde zubietarrak, Juan Pedro Goñi oiztarrak eta Jose Luis eta Jon Olaizola doneztebarrak; Zubietako talogileek; Oizko Carlos Mindegia gasnagileak, zeramika lanak egiten dituen Daniel Fioramante oiztarrak eta zilarra lantzen duen Malu Alvarez eratsundarrak.