Nafarroako Gobernuak milioi terdi euroko inbertsioa eginen du 2008garren urtean, banda zabalaren bitartez Interneterako sarbidea hedatzeko Nafarroan. Jose Maria Roigh ldasoro, Berrikuntza, Enpresa eta Enplegurako kontseilariak jakinarazi duenez, etxebizitzetan banda zabalaren bitartez Interneterako konexioa eta alta emateko inbertsioa 600.000 eurokoa izanen da; zerbitzurik ez duten inguruetan satelite eta uhin bidezko zerbitzua eskaintzeko esperientzia pilotoak egiteko 431.000 euroko inbertsioa eginen da eta Nafarroako Aurrekontu Orokorretan 500.000 euro gehiago bideratuko dira banda zabala Nafarroa osora hedatu nahizik. Nafarroako Gobernuko iturriek diotenez, Nafarroako bizilagunen %99,23ak dauka Interneter banda zabalaren bitartez konektatzeko aukera eta %100era iritsi nahi luke.
40 euro etxebizitza bakoitzeko
Etxebizitzetan banda zabala eta ADSL konexioa jartzeko eta alta emateko dirulaguntzei dagokienez, etxebizitza bakoitzeko 40 euroko dirulaguntza emanen da eta deialdia 15 egunen buruan argitaratuko dela kontuan hartuz, eskariak apiriletik aitzinera egiten ahal dira. Aipatzekoa da 2007garren urtean 14.000 dirulaguntza eman zirela.
WIMAX estazioak Etxalar eta Sunbillan zerbitzua hobetzeko
Satelite eta uhin bidez egiten diren esperientzia pilotoei dagokienez, horietako batzuk eskualdean izanen dira. Honela, Etxalarren, uhin bidezko WIMAX estazioa paratuko da Etxalarren, lehendik proiektu piloto gisara ezarria zegoen WIFI sistema ordezkatzeko. Izan ere, Etxalarko erabiltzaileak auniztan kexu agertu dira zerbitzua eten egiten delako eta ez duelako beharrezko abiadurarik eskaintzen. Doneztebeko telekomunikazio zentroan ere WIMAX estazioa jarriko da, Sunbillako auzo bati kobertura eman ahal izateko. Auzo horretan etxebizitzak eraikitzen ari dira eta eskaria handia da.