Ortziral honetan, azaroak 19, Doneztebeko feria egunaren barnean jokatuko da Nafarroako aizkolari txapelketa nagusiaren finala. Bertan izanen dira Floren Nazabal, Donato Larretxea, Daniel Bizente, Jose Juan Barberena eta Juan Jose Lopez. Etxarri-Aranazen urriaren 3an egindako sailkapen saioan beraiek eskuratu zituzten finala jokatzeko eskubidea ematen zuten bortz txartelak. Hutsune nabarmena izanen da aurtengo finalean. Mikel Mindegia beteranoa ez da finalean izanen, ez erretiratu delakoz, kanporaketa saioan eri zelakoz baizik eta horren mediku ziurtagiria aurkeztu zuen. Antonio Jaunarena ere erixko zegoen aste osoan, baina azkenean kanporaketara agertzea erabaki zuen eta azken postuan sailkatu zen.
Doneztebeko finala 17:30etan hasiko da eta aizkolari bakoitzak lau kanaerdiko, lau 60 ontzako eta bi oinbiko moztu beharko ditu.